ភ្នំពេញ៖ ក្រសួងសេដ្ឋកិច្ចនិងហិរញ្ញវត្ថុ អនុញ្ញាតឱ្យក្រសួងសុខាភិបាលប្រមូលចំណូលកម្រៃពីសេវាផ្តល់បណ្ណចាក់វ៉ាក់សាំងកូវីដ-១៩ ពីម្ចាស់ មូលដ្ឋានសេវាសុខាភិបាលឯកជន (មន្ទីរពេទ្យ មន្ទីរពហុព្យាបាល មន្ទីរសម្រាកព្យាបាល និងមន្ទីរសម្ភព) ដែលទទួលបានលិខិតអនុញ្ញាតពីក្រសួងសុខាភិបាល លើការផ្តល់សេវាចាក់វ៉ាក់សាំងកូវីដ-១៩ នៅក្នុងព្រះរាជាណាចក្រកម្ពុជា។
ក្នុងសេចក្ដីប្រកាសអន្តរក្រសួងចុះថ្ងៃទី៤ កុម្ភៈក្រសួងសេដ្ឋកិច្ច និងក្រសួងសុខាភិបាល សម្រេចផ្ដល់បានចាក់វ៉ាក់សាំងកូវីដ-១៩ ដល់ពេទ្យឯកជនដែលបានស្នើសុំទៅកាន់ក្រសួងសុខាភិបាល និងបានបញ្ជាក់ពីបច្ចេកទេសវេជ្ជសាស្រ្តត្រឹមត្រូវក្នុងការចាក់វ៉ាក់សាំង។
តម្លៃបណ្ណចាក់វ៉ាក់សាំងកូវីដ-១៩ មានតម្លៃ ៤ ០០០រៀលក្នុងមួយបណ្ណ ដែលម្ចាស់មូលដ្ឋានសេវាសុខាភិបាលឯកជន ត្រូវបង់កម្រៃសេវាជូនក្រសួងសុខាភិបាលនៅពេលបានបណ្ណ។
ចំណូលកម្រៃពីសេវាផ្តល់បណ្ណចាក់វ៉ាក់សាំងកូវីដ-១៩ ដែលក្រសួងសុខាភិបាលប្រមូលបាន ត្រូវកត់ជាចំណូលថវិកាជាតិ៕
